ऐगे बगत चुनौ कू धकी धैं धैं
ह्वेगे नामांकन तौं कू धकी धैं धैं
रचे सीटूं को बंट्वारू धकी धैं धैं
होये पार्ट्यूं को संट्वारू धकी धैं धैं
मैक भोंपू बाजीगा धकी धैं धैं
सैरा गाजर गाजीगा धकी धैं धैं
सुण परचारी भगता धकी धैं धैं
खाण प्यौणौ को बगता धकी धैं धैं
गाड़ ढोल बाजा कंसाळ धकी धैं धैं
बजौ वोटों की धुंयाळ धकी धैं धैं
सोळा बर्षूं का सराद धकी धैं धैं
पोड़ीं औंसी की सि रात धकी धैं धैं
राज लमडायूं ढंगार धकी धैं धैं
वादा नारौं कू ठुंगार धकी धैं धैं
स्वीणा चौबाटा बेच्यालि धकी धैं धैं
गळा बाड़ी सी खैंड्यालि धकी धैं धैं
मार तीलू सी किलक्वार धकी धैं धैं
कैर बैर्यूं को संघार धकी धैं धैं
त्यरा भविष्य का फूल धकी धैं धैं
बूजा लगैई ना कूल धकी धैं धैं
तिनै धन्ना बोल धकी धैं धैं
ऐंसु बिकी न जै मोल धकी धैं धैं।