(ઢાળ : મ્હોલે પધારો, મ્હારા રાજ! માણીગર! મ્હોલે પધારો)
ફૂલડાં ઊગ્યાં અણમોલ ચાંદલિયાની ડાંખળીએ રે;
એવા કંઈ રસના બોલ ઊગે મ્હારી આંખડીએ રે.
ચાંદણીઓ વેરી ચન્દ્ર ચાલે રે
ઠમક ઠમક ઠમકન્ત;
વેરું હું એવી તેજપગલીઓ
મારગડે મલકન્ત:
ચાંદલિયાની ડાંખળીએ રે.
સેંથે ઓઢી મેઘઓઢણી રે,
ચન્દની ચણિયાને ઘેર;
ચન્દ્રકલા આ કલા કરી ચમકે;
કરું હું કલા એ પેર:
ચાંદલિયાની ડાંખળીએ રે.
કિરણો રચે અલબેલડી રે,
અલકલટો ચન્દ્રભાગ્ય;
છૂટો મ્હેલ્યો મ્હારો અજબ છટાનો
અંબોલડાનો સોહાગ:
ચાંદલિયાની ડાંખળીએ રે.
રૂપનો સાગર ડોલતો રે,
ચન્દ્રી ઝીલે એ જુવાળ;
કોડભરી એવી હું ય કુમારી
દેવસુધાનો થાળ:
ચાંદલિયાની ડાંખળીએ રે.
ફૂલડાં ઊગ્યાં અણમોલ ચાંદલિયાની ડાંખળીએ રે;
એવા અમૃતના બોલ ઊગે મ્હારી આંખડીએ રે.