भारत की संस्कृति के लिए... भाषा की उन्नति के लिए... साहित्य के प्रसार के लिए
अगहन - २ / ऋतु-प्रिया / चन्द्रनाथ मिश्र ‘अमर’
Kavita Kosh से
घनहन अगहन धनधन जीवन
झनझन बाजय धान
हाँसू हाथ कान्ह पर बहिङा
गावय मुदित किसान
भूखक धह-धह ज्वाला पजरल
कातिक विपति आबि सिर बजरल
बिसरल से दुख, पुलकित तनमन
सब जन एक समान
घनहन गहन धनधन जीवन
झन - झन बाजय धान
धन ऋतुराज हेमन्तक आङन
छीटल अछि घसि चानक चानन
सुरभित थल, प्रियगर लगइत छथि
तेँ दिनकर भगवान
घन हन अगहन धन - धन जीवन
झन - झन बाजय धान
शीतल कण नव दूबिक दल पर
अक्षत बनि लटकल चकमक कर
प्रकृति नटी दूवक्षित लय
करइत छथि ककर चुमान
घनहन अगहन धन-धन जीवन
झन - झन बाजय धान
