असीं / अनन्द खेमाणी
असीं
सरगसी शोर जा
सुर आहियूं
जिनि खे
पंहिंजो
अलॻ ग्रामर आहे
असां जा बि
आदर्श आहिनि, उसूल आहिनि
जिनि जा सूत्र, असां जे,
नेता जे
इशारनि सां
जुड़ियल आहिनि
केरु
दुखी आहे
केरु सुखी
असां जो छा?
हिक इशारे ते
असीं
गॾिजी वेन्दा आहियूं
शहर जे
सड़कुनि तां
बे-अर्थ
नारनि सां
बैनर खणी
क़मीस-ब्लाऊज़नि में
ॿिला अटिकाए
कुन्द नग़ारनि ते
घुटियल ॾौंका हणी
पंहिंजी कंहिं
नफ़ीस बेईमानीअ खे
खू़बसूरत
लफ़ाज़ीअ में
वकोड़े
उन ते
देश-प्रेम
राष्ट्रीय-हित जा
चांदी-ठा हणी
अखियुनि में
अशराफ़त
ऐं शहीदी भाव खे
सुकल आंसुनि जे
गंगाजल में
छुहाउ ॾेई
बेजान
पथरनि जी
पवित्रता खे
पंहिंजी
शैतानी धड़कनि ॾेई
उछिलाईन्दा आहियूं
उन्हनि जूं
चुंहिंबूं
कंहिं खे
पंहिंजे आ़गोश जी
तपति
अता थियूं कनि
इहो सुवालु
अजु
असां लाइ
बे-माना थी
चुको आहे
ॿारु मरे
या अबहम बालि़गनि
या औरत
या जीअण जी
अञा आस में
तिॻन्दडु़ बुढो
असां जा उसूल
इन्हनि मिड़नी जे
ज़िन्दगीअ खां
ऊचा आहिनि
हूंअ बि
हिक खे मारण लाइ
मुल्क जो क़ानून
सज़ा-ए-मौत
ॾीन्दो आहे
लेकिन
अनेक अनेक शख़्सनि खे
मारणु सिर्फ़
जलूस में ई
मुम्किनि ऐं बेॾोह आहे
असांजे पुठियां
असां जा
नंढा नंढा
नेता आहिनि
उन्हनि जे पुठियां
निसता
वॾा वॾा नेता
लेकिनि
इन्हनि सभिनी जे पुठियां
हिकु महा नेता
बिराजमान आहे
जंहिं खे
जदीद मुहावरे में
वक़्त सां गडु हलण जो हौसलो सॾिबो आहे।
