भारत की संस्कृति के लिए... भाषा की उन्नति के लिए... साहित्य के प्रसार के लिए
आकाङ्क्षाका अनगिन्ती / सानु शर्मा
Kavita Kosh से
आकाङ्क्षाका अनगिन्ती लहरहरूले
अधकल्चो पारिरहेछन् रहरहरूले
दूरीलाई किन दोष लगाउँछौ तिमी, प्रिय
नजिकिन दिँदैनन् मान्छेका नजरहरूले
मनभित्रै बसाएपछि अँध्यारोको शहर
मन कहाँ छुन्छन्, उज्याला प्रहरहरूले ?
चुँडिनैछ भने यदि सम्बन्धको डोरी
जोगाउँदैनन् ढुङ्गा-माटाका घरहरूले
देशमा सुधार होला भनी आशा नगरे हुन्छ
जबसम्म शासन गर्छन्, जोकरहरूले
आफ्ना लागि गर्नुपर्ने, आफैँले नै गर्नू, सानु!
केही गरिदिँदैनन्, यहाँ कुनै ईश्वरहरूले
