भारत की संस्कृति के लिए... भाषा की उन्नति के लिए... साहित्य के प्रसार के लिए
लोक संगीत
कविता कोश विशेष क्यों है?
कविता कोश परिवार

आतङ्क / श्रवण मुकारुङ

Kavita Kosh से
यहाँ जाएँ: भ्रमण, खोज


हजारौँ मानिसहरू मरिसके
हजारौँ मानिसहरू मरिरहेछन्
सम्भवतः
हजारौँ मानिसहरू मर्नेछन्

प्रत्येक क्षण
मानिसको मृत्यु
आतङ्क भएर फैलिरहेछ– यो देशमा

अस्वाभाविक होइन– मृत्यु
आश्चर्य होइन– जन्मिएपछि मर्नु

कुनै स्वाभाविक ंयोगस
कुनै सजिलो घटना
अथवा–
हजारौँहजार सम्भावनाबीच
सूर्यको राप समातेर
मानिस आएको छ– यस पृथिवीमा
यी फूलहरू
यी चराहरू
यी खोला, पहाड, आकाश र क्षितिजहरू
आइपुगे जसरी– समयको स्वभाव भएर
 
यी सपनाहरू
यी दुःखहरू
यी माया, करुणा, क्षमा र क्रूरताहरू
आइपुगे जसरी– जीवनको अंश भएर

मृत्यु कसरी हुन्छ– अनौठो... ?
मृत्यु कसरी हुन्छ– आतङ्क... ?

आतङ्क त विचार हो
जसलाई हामी त्यागिदिन सक्छौँ
आतङ्क त व्यवस्था हो
जसलाई हामी भत्काइदिन सक्छौँ