इंटेनसिव केयर यूनिट में पहिरीं रात / मोहन कल्पना
रात ॾींहं में फ़र्कु आहे
राति जो मां सोच में
हिकु बहादुर ऐं ज़हीन
हार खां कुझु गै़र वाक़िफ़-
बास, जो थो अखि ॾेखारे
यारु, जो भूंडो नसीहत जो ॾिए
या मुसाफ़िरु ट्रेन जो
जेको मूंखां अगु थो ख़ाली सीट वालारे
या त आटो वारो को
जेको भाड़े ते कॾहिं धांधल करे
या फ़िल्म जो दादा को
ॿीणा पैसा थो छॾाए
या डुकारी देस सेवकु
मंत्रियनि जी महिर सां
अघ वधाए खापतनि जा
पंहिंजी उपति खे
लॻाईनि हिकु मंधीअड़ो
क़र्ज़ वारो पुख़्तो नज़रुनि खे कन्दो
हेठियें चप खे साॼे खेंचे
मोड़ो ॾीन्दी माहजबीं
उभु कढी ॼिभ,
चंड खे-
वक़्ते वेचारा ॾीन्दो
मां थो तन खे सोच में लटिकायां उबतो
चिंड खे मोको बणाए
कंहिं जे़ फटनि में लॻायां-
माहजबीं खे इंडलठि जो
झूलो बख़्शियां
हिक फ़रहती मुरिक मुंहिंजी
अल फ़तअ शहनशाहु मां-
रात मुंहिंजी सलतनत-
पर सुबूह जो अधमुअलु
जाॻ मं ॼणु अध सुतलु
पंहिंजी हस्ती
बारु समुझी,
लटिकी लटिकी शहर पहुचां
बेज़बान
बरख़्वासत, मौकूफ़!
सोचु पंहिंजो थो लॻे
कुझु अजनबी
शहर, माण्हू अजनबी
ऐं घिटीअ जा के वराका...
कुंड पकिड़े बीठी आहे छोकिरी
-कल्ह जियां
रोज़ खेसि, लिफ़्ट हासिल
ज़िन्दगीअ जी लिफ़्ट खां आ,
हिक उमिरि महरूम
-मूं जियां
पान जे थुकुनि जा नक़्शा
गूणि ते बेसुर्ति कूली
कैफ़े में ओबाश मुफ़किर
खीसा ख़ाली नौजवान
बहस माडर्न आर्ट ते-
ख़ाली हथ सां हिकु बिखारी
विश्व बैंक सेशन में आहे
गाॾीअ हेठां
टंग भॻलु लटिकियलु कुतो
ऐं छॼे ते हिक ॿिली
ताड़ में-
हासिल कबूतरु को थिए
शेख अयाज़ या मुजीब!
हुॿ अन्दर ऐं शहर में
चीचाटु पुठियां कार जो-
बोर्ड ॼणु
मुनिसपल जा नकुल सूधो
डेथ सरटीफ़िकेट
लॻनि था
शहरु ॼणु हिक अस्पताल
शख़्सु ॼणु आ दाखि़ला लाइ दर-ब-दर
ज़हन जी ‘नो एंटरी’
बोर्ड भरिसां
बीठो आहे संतरी बंदूक़ सां-
वतन लइ वीज़ा खपे
बे वतन लइ
मुंहिंजे क़द खां शास्त्रा ऊचियूं
धर्म, मज़हब, क़ौमियत जूं मुतक़ी
बेहूद दीवारियूं...
मां अपाहिज
लूलो लंगड़ो गूंगो ॿोड़ो
हिकु बेगानो अजनबी
मुंहिंजो कोई नाहि नालो
चेहरो कोई, या सुञाणप कार्डु!
चौतरफ़ बसि रुञ ऐं पाछा
सुञ पड़ाॾा शमशान कब्रिस्तान-
”डाक्टर, छा ही बचन्दो?
या ही मरन्दो?“
”फ़र्कु कोन्हे
ज़िन्दगी ऐं मौत में
हस्ती पालणु आहि जीअण जो विहु
खोखला इनसान आहिनि
आत्मा खां ख़ाली बोता!“
मुंहिंजे मुंहं ते
माठि जा दस्ता लॻनि था
रतु वहे थो सीने मां...
मूं न पंहिंजे हक़ में ॼातो:
मौतु छाहे!?
पर विरहाङे में लॻो हो
कुझु मुओ आहे अज़ीम!
मूं न पंहिंजे हक़ में ॼातो:
मौतु छोहे!?
पर बि मूंखे इएं लॻो आ
मुंहिंजो कोई ”मां“ न आहे
मूं ॾिठी आ ज़िन्दगी
बे ज़िन्दगी
मूं त दुनिया आ ॾिठी
ख़ुद बिना
खु़द बिना दुनिया न ॾिसन्दुसि मां कॾहिं
रात हिक विश्वासु आहे
ॾींहुं उन जी ख़ुदकशी...
