भारत की संस्कृति के लिए... भाषा की उन्नति के लिए... साहित्य के प्रसार के लिए
उरीस / चंदन कुमार झा
Kavita Kosh से
नान्हि टा उरीसमे
नहि रहैत छैक
ककरो गीड़ि जयबाक शक्ति
नहिएँ करैत अछि
सोझाँसँ ढाही लेबाक गुमान
ओकरा माथमे पैसल रहैत छैक
सदति एक टा बिनबिन्नी
काठक अन्हार गुज्ज फाँकसँ
बहरयबाक औनैनी
नहि होइत छैक
बिखाह चाँगुर कि दाँत ओकरा
नहिएँ रहैत छैक
मनुक्खक प्राण हरबाक विष
मुदा रहैत छैक बिन्हबाक सूढ़
शोणित पीबाक शक्ति
लोककेँ सूतय नहि देबाक
गुण कि अवगुण !
सम्भव नहि एहि रक्तबीजक
कुल-मूलक उकन्नन
कोनो अस्त्र-शस्त्र
कि रासायनिक प्रयोगसँ
एकर सर्वनाश हेतु
राखय पड़छ सजगता
राखय पड़ैछ अपनहि स्वच्छता
