भारत की संस्कृति के लिए... भाषा की उन्नति के लिए... साहित्य के प्रसार के लिए
ओळख / चंद्रप्रकाश देवल
Kavita Kosh से
म्हारैं अठै नाजी हा इज कोनी
तगड़ नै बारै कढण रौ जोखम नीं हौ
अर हा जिकां नै म्हे सावळ
ओळखता नीं हा
असल में
निवेड़ौ अेक अणूंतौ बोझाळू सबद है
खराखरी वौ व्है
रगत मांयला लोह सूं भारी
अळगै सूं
सियाळै निजर-तप तापता
निवास मैसूसता म्हे
रह्या हरमेस खाली
हां, आज री घड़ी खाली
खाली जांणै आटौ रौ पीपौ
खाली जांणै देह रौ ठांम
खाली जांणै झंडा री थोथ
खाली जांणै गुलांम री जात-गोत
खाली जांणै इतियास बारली तिथ
खाली जांणै धाप नै रोयां पूठै आंख।
