किसानी खातर भारत बंद घणा कसूता होवैगा / रणवीर सिंह दहिया

किसानी खातर भारत बंद घणा कसूता होवैगा॥
कमेरा हिंदुस्तानी किसान बीज एकता के बोवैगा॥
कारपोरेट के खिलाफ छेड़ दई जंग पूरी देखो
सरकार इसकी तलहडू सै करै जी हजूरी देखो
आर पार की लड़ाई होगी मोदी नई झूठ टोहवैगा॥
काल हिंदुस्तानी किसान बीज एकता के बोवैगा॥

जात धर्म इलाके पर लड़वा कै तेज कररे लूट म्हारी
किसानों और मजदूरों कै दे दी आछे ढाल बुहारी
तीन बिल किसान विरोधी मोदी देश नै डबोवैगा॥
काल हिंदुस्तानी किसान बीज एकता के बोवैगा॥

निजीकरण करकै सारे महकमे  बेच रहया सै
अडानी अम्बानी के निशाने पै टेक रहया सै
संविधान की परवाह कोण्या सम्मान देश का खोवैगा॥
काल हिंदुस्तानी किसान बीज एकता के बोवैगा॥

समझ बूझ तै सँघर्ष को आगै लेज्यावैंगे भाई
या नब्बे दस की लड़ाई जीत कै दिखावैंगे भाई 
रणबीर सिंह बरोने आला नए-नए छंद पिरोवैगा॥
काल हिंदुस्तानी किसान बीज एकता के बोवैगा॥