कुछ ना बर तेरा हे, तेरी अंजना जोड़ी ना मिली / मेहर सिंह
जवाब सहेलियों का
सै तेरे पिता की गलती, तेरी शक्ल पवन ते ना मिलती,
कुछ ना बर तेरा हे, तेरी अंजना जोड़ी ना मिली।टेक
तेरी बातां मैं ना गेरुं दर्क
सुरग नै छोड़ भाजगी नर्क
तूं खिलरी भान गगन का
यो फर्क रात और दिन का
जल्या पवण अंधेरा हे, तेरी अंजना जोड़ी ना मिली।
तूं म्हारे मैं सै लाल किरोड़ी
क्यूं शर्माकै गर्दन मोड़ी
तेरी बेशक आयु थोड़ी थी
तेरी गर्न्धव तैं जोड़ी थी
न्यू जी जलता मेरा हे, तेरी अंजना जोड़ी ना मिली।
हम तुम साथ रहे दिन रात
बाहण म्हारा दुःख पा रहया सै गात
या बात समझ मैं ना आती
तरे सैं दुःख सुख के साथी
मेरै दर्द घनेरा हे, तेरी अंजना जोड़ी ना मिली
तेरी करणी मैं पड़ग्या भंग
उड़ै हो ज्यागी तूं काफी तंग
मान ले मेहर सिंह का कहना
ना तै दुःख पावै मेरी बहना
यो गर्दिश का फेरा हे, तेरी अंजना जोड़ी ना मिली।