भारत की संस्कृति के लिए... भाषा की उन्नति के लिए... साहित्य के प्रसार के लिए
कैसे धीरज धारूँ मनमें / स्वामी सनातनदेव
Kavita Kosh से
राग पूरिया, तीन ताल 22.7.1974
कैसे धीरज धारूँ मनमें।
तुम बिनु रमत नाहिं मनमोहन! यह मन घर वा वन में॥
तुम ही कों ढूँढ़त यह इत-उत आतुर ह्वै कन-कन में।
जदपि तुम्हीं सब हो, पै यह तो मोह्यो स्याम-रतन में॥1॥
हिय की हिलग होत अपनी ही, आत न कहन-सुनन में।
करत रहत हियकों वह आतुर हुमकि-हुमकि छिन-छिन में॥2॥
सब कुछ तुम हो, तदपि सबहि लखि चैन नाहिं नयननमें।
ललकि-ललकि खोजहिं अपनी निधि प्रियतम! ये कन-कन में॥3॥
कहा कहों, जानहु तुम सब कुछ, बूझहुँ हौं हूँ मन में।
मेरी बूझ अबूझ भई, पै तुम क्यों सूम करन में॥4॥
हो उदार-चूड़ामनि, फिर क्यों देरी करहु सुनन में।
टेरि-टेरि हार्यौं मैं, पै क्यों टेर न परी स्रवनमें॥5॥
अब जनि देर करहु मनमोहन! अगिन लगी प्रानन में।
दरस-सुधा दै सींचहुगे तो बात बनहिगी छिन में॥6॥
