जब रंग चढ़ैगा, मिशन बढ़ैगा / करतार सिंह कैत
जब रंग चढ़ैगा, मिशन बढ़ैगा न्यू समझाणा हो सै
भीम मिशन बिना भरी सभा म्हं और के गाणा हो सै...टेक
हाथ जोड़ कर अर्ज करूं म्हारे सब गायक कलाकारों से
सच्चा आनन्द लेणा चाहिए असली मिशन बहारों से
भीम भीम कर घड़ा बजै, खड़ताल भीम झंकारों से
भीम तरंग लिकड़णी चाहिए म्हारे बैंजू की तारों से
हारमोनियम नै भी पंचम सुर तै भीम जपाणा हो सै
भीम मिशन बिना...
दूसरा नंबर अर्ज सभी से ऐसा मेल-मिलाप करो
जो गलती भी हो जावै फेर सभा म्हं पश्चात्ताप करो
जिम्मेवारी समझ कै सारी काम अपना आप करो
आगै मिशन बढ़ावण खात्तर सारे रिश्ते साफ करो
कठिन डगर पै चलकै भाइयों मंजिल तक जाणा हो सै
भीम मिशन बिना...
तीसरे नम्बर अर्ज करूं सभा म्हं बैठे सार्यों से
खूब समझ कै रहणा होगा कुछ नकली ठेकेदारों से
ये मतलब खात्तर बात करैं, म्हारे भीम मिशन अहलकारों से
करकै मिशन साहब का चोरी फेर जा मिलते गद्दारों से
इसे इस्यां का भला नहीं हो दुनिया का कहणा हो सै
भीम मिशन बिना...
सच्चे माणसां नै भीम मिशन न्यू जी तै प्यारा लागै सै
नुगर्यां कै टेंशन हो ज्या मेरा बोल करारा लागै सै
साफ समझ म्हं भीम मिशन का झटका न्यारा लागै सै
बेअकल्यां नै कोकतिया पागल करतारा लागै सै
फेर गाण तै पहल्यां सच्चे मन तै गुरु मनाणा हो सै
भीम मिशन बिना...
