जीतू बगडवाल / भाग 1 / गढ़वाली लोक-गाथा
- अंगिका लोकगीत
- अवधी लोकगीत
- कन्नौजी लोकगीत
- कश्मीरी लोकगीत
- कोरकू लोकगीत
- कुमाँऊनी लोकगीत
- खड़ी बोली लोकगीत
- गढ़वाली लोकगीत
- गुजराती लोकगीत
- गोंड लोकगीत
- छत्तीसगढ़ी लोकगीत
- निमाड़ी लोकगीत
- पंजाबी लोकगीत
- पँवारी लोकगीत
- बघेली लोकगीत
- बाँगरू लोकगीत
- बांग्ला लोकगीत
- बुन्देली लोकगीत
- बैगा लोकगीत
- ब्रजभाषा लोकगीत
- भदावरी लोकगीत
- भील लोकगीत
- भोजपुरी लोकगीत
- मगही लोकगीत
- मराठी लोकगीत
- माड़िया लोकगीत
- मालवी लोकगीत
- मैथिली लोकगीत
- राजस्थानी लोकगीत
- संथाली लोकगीत
- संस्कृत लोकगीत
- हरियाणवी लोकगीत
- हिन्दी लोकगीत
- हिमाचली लोकगीत
जीतू व शोभनू होला, गरीबा का बेटा,
माता त सुमेरा छई, दादी फ्यूँली जौसू।
दादा जी कुंजर छया, भुली[1] शोभनी छई,
जाति को पंवार छयो, जीतू अकलि गँवार,
बगूड़ी[2] जैक भौजी, होंई गैन बगड्वाल!
राज मानशाइन दिने, कमीणा[3] को जामो[4],
गौ मुंडे[5] को सेरी[6] दिने, गौ मथे[7] को धारो[8]
जीतू रये दादू, मादू[9] उदभातू[10]
राणियों कू रौसिया[11], रये फूल को हौंसिया।
अणव्याई[12] बेटियों कू, ठाकुरमासो[13] खाये,
बांजा[14] घटू[15] को, वैन, भग्वाड़ी[16] उगाये,
ऊं बांजो[17] भैंस्यों को, पालो[18] लिने परोठो[19],
जीतू रये भैजी, राजौं को मुसद्दी।
बगुड़ ऐगे भैंजी, उल्या-मुल्या[20] मास,
तब जितेसिंह राजा, धाविड़ी[21] लगौंद-
ओडू़[22] नेडू़[23] औंदू, मेरा भुला शोभनू
सोरा-सरीक भुला, सब सेरा सैंक लैन,
कि मलारी को सेरो हमारो-
बाँजो रैगे त, बाँजो मेरा दादू।
तू जायौदू भुला[24], जोशी[25] का पास,
गाड़ीक लऊ, सुदिन सुवार
सुदिन सुवार लौणा, लुंगला[26] को दिन।
पातुड़ी की भेंट धरे, सेला चौंल पाथी[27],
धुलेंटी[28] की भेंट धरे, सोवन[29] को टका।
चलोगे शोभनू तब, बरमा[30] का पास,
जाईक माथो नवौन्दो, सेवा लगौंदो
पैलगु पैलगु मेरा बरमा।
चिरंजी जजमान मेरा।
भैंर[31] गाड़[32] बरमा, धुलेटी[33] पातुड़ी,
धुलेटी पातुड़ी गाड, सुदिन सुवार।
गाडी याले बरमान, धुलेटी पातुड़ी,
देखद देखद बरमा, मुंडली[34] ढगडयोंद[35],
तेरी राशि नी जूड़दो जजमान
तुमारी बतैन्दी बल, वा वैण[36] शोभनी,
शोभनी क हाथ जूड़े, लुंगला को दिन।
लुंगला को दिन, छै गते अषाढ़।
वावैण मेरी रन्दी, कठैत का गाऊं
चूला कठूड़ तै, बाँका वनगड़।
सोचदू सोचदू तब, घर ऐगे शोभनू
पौंछीगे[37] तब, जीतू का पास-
खरो मानी जदेऊ[38], मेरा जेठा-पाठा भैजी,
तेरी राशि नी जूड़े दिदा[39] लुंगला[40] को दिन।
हमारी बतैंछ[41] भैजी, वा वैणा शोभनी
शोभनी का हात जूँडे, लुंगला को दिन।
जीतू भिभड़ैकै[42] उठे तब, गए माता के पास,
हे मेरी जिया, हमारी राशि नी जूड़े, लुंगला को दिन!
मैं त जाँदू माता, शोभनी बैदौण[43]।
तू छई जीतू, बावरो[44] बेसुवा[45],
शोभनी बैदौण जालौ, तेरा भुला शोभनू।
भुला शोभनू होलू माता, बालो अलबूद[46],
मैं जौलू माता, शोभनी बैदौण।
न्यूतीक बुलौलो, पूजीक पठोलो[47]।
नी जाणू जीतू, त्वैक[48] ह्वैगे असगुन,
तिला बाखरी तेरी, ठक[49] छयू[50] दी।
नि लाणी जिया[51], त्वैन इनी छुँई[52],
घर बोड़ी[53] औलो, तिला मारी खोलो।
भैर[54] दे तू मेरो, गंगाजली जामो[55],
मोडुवा[56] मुन्डयासो[57] दे दूँ, आलमी इजार
घावड्या बाँसुली दे दूँ, नौसुर मुरुली।
न जा मेरा जीतू, कपड़ो तेरो झौली[58] ह्वैन मोसी[59],
आरस्यो[60] को पाग तेरो, ठनठन टूटे।
त्वैक तई ह्वैगे, जीतू यो असगुन!
माता की अड़ैती[61] जीतू, एक नी माणदू,
लैरेन्द[62] पैरेन्द तब, कांठो[63] मा को-सी सूरीज[64],
गाड़ को-सी माछो, सर्प को-सी बच्चा,
बाँको वीर छयो, जीतू नामी भड़,
राजौं को माण्यु छयो, रूप् को भर!
- ↑ छोटी बहन
- ↑ एक जगह
- ↑ सामन्त
- ↑ पद
- ↑ नीचे
- ↑ खेत, धान वाला
- ↑ ऊपर
- ↑ पानी का स्रोत
- ↑ मस्त
- ↑ उन्मत्त
- ↑ रसिया
- ↑ अनब्याही
- ↑ कर
- ↑ उजाड़
- ↑ घराट
- ↑ भाड़ा
- ↑ बाँझ
- ↑ कर, दूध
- ↑ एक बर्तन
- ↑ चौमासा
- ↑ आवाज
- ↑ और
- ↑ नजदीक
- ↑ छोटा भाई
- ↑ ज्योतिषी
- ↑ रोपण
- ↑ एक पाथा, चार सेर
- ↑ पटला
- ↑ सोने
- ↑ ब्राह्मण
- ↑ बाहर
- ↑ निकाली
- ↑ पटला-पत्रा
- ↑ सिर
- ↑ हिलाया
- ↑ बहन
- ↑ पहुँच गया
- ↑ नमस्कार, जयदेव
- ↑ बड़ा भाई
- ↑ रोपण
- ↑ बतायी
- ↑ भड़भड़ाकर
- ↑ बुलाने के लिए
- ↑ बावला
- ↑ झक्की
- ↑ अल्प बुद्धिवाला
- ↑ भेजना
- ↑ तुम्हें
- ↑ एकदम
- ↑ छींक मारी
- ↑ माँ
- ↑ बातें
- ↑ लौटकर
- ↑ बाहर
- ↑ कपड़े
- ↑ सिर की
- ↑ पगड़ी
- ↑ झलक
- ↑ काली
- ↑ अर्से
- ↑ सीरज
- ↑ सजा-धजा
- ↑ चोटी पर
- ↑ सूरज, चावल की मिठाई
