भारत की संस्कृति के लिए... भाषा की उन्नति के लिए... साहित्य के प्रसार के लिए
टंडेल / कुंदन अमिताभ
Kavita Kosh से
बसबिट्टी केरऽ छाहरी में
नद्दी लगाँ
बंसी लेॅ केॅ बैठलऽ छै
गामऽ के छौड़ा
बंसी में छै मजगत डोरऽ
डोरऽ में छै चोखऽ खुद्धन
खुद्धन में छै
माँटी तरऽ सें निकाललऽ
हदियैलऽ जोंकटी
जोंकटी केरऽ गंध
पानी तरऽ में
सगरे पसरी रहलऽ छै
मछरी सूँघी केॅ ऐतै
जोंकटी केॅ हपकन मारतै
खुद्धन में खुद
बझलऽ चल्लऽ जैतै
डोरऽ सें बँधलऽ टंडेल
उब-डुब करेॅ लागतै
छौड़ाँ बंसी केॅ
तड़ाक छीपी लेतै
मछरी निकाली केॅ
फेरू सें खुद्दन में
दोसरऽ जोकटी पिरैलऽ जैतै
फेरू सें
टंडेल केरऽ टंडेली सें
मछली फँसाबै में
तल्लीन होय जैतै
गामऽ के छौड़ा।
