भारत की संस्कृति के लिए... भाषा की उन्नति के लिए... साहित्य के प्रसार के लिए
टेसू रं गाल लाल / राजकुमार
Kavita Kosh से
टेसू रं गाल लाल हरियर छै सारी
सावन रोॅ सेजिया पर अल्पना कुमारी
पछिया के महा नें अँचरा झकझोरै छै
आगि जे पझैलोॅ छै कलेॅ-कलेॅ खोरै छै
नीपै छै गोरिया के ऐंगना-देहारी
टेसू रं गाल लाल हरियर छै सारी
लागलोॅ झपासी में पुरबा झकासै छै
पोखरी में पुरइन रोॅ पात-पात भाँसै छै
नाचै छै मधुमाछी भँवरा जुआरी
टेसू रं गाल लाल हरियर छै सारी
मुखड़ा गुजरिया रोॅ दर्पण दरकाबै छै
चिमनी चटकाबै छै अंजन बरकाबै छै
चन्दन पर नागिन के खुललोॅ पेटारी
टेसू रं गाल लाल हरियर छै सारी
‘राज’ रात करकुट्ठोंॅ टिमिर-टिमिर बाती छै
सुगिया के लोलोॅ में असरा के पाती छै
कजरी के नजरी में कजरा मुरारी
टेसू रं गाल लाल हरियर छै सारी
