तोरे सोहे पाव पैजनिया माई के बलमा / बुन्देली

तोरे सोहे पांव पैजनिया, माई के बलमा।
माथे मुकुट माल रतनन की
ओढ़ें लाल उढ़निया, माई के बलमा। तोरे...
हाथन में हंथचूरा सोहे,
अंगुरिन बीच मुदरिया, माई के बलमा। तोरे...
बाजूबन्द भुजन पे सोहे,
कमर में करधनिया, माई के बलमा। तोरे...
एक हाथ में खड़ग लिये हैं।
दूजे तीर कमनिया, माई के बलमा। तोरे...
तीजे हाथ त्रिशूल बिराजे
चौथे खप्पर अंगनिया, माई के बलमा। तोरे...
सिंह सवार भई जगतारन
छबि न जात बखनियां, माई के बलमा। तोरे...
पांच भगत माई तोरे जस गावें।
छवि न जात बखनियां, माई के बलमा। तोरे...