भारत की संस्कृति के लिए... भाषा की उन्नति के लिए... साहित्य के प्रसार के लिए
दिवलो अर बाती / निर्मल कुमार शर्मा
Kavita Kosh से
बडेरां सूं सुणतो हो
अेक नान्हो दिवलो
आंधड सूं भिडग्यो
आधड थाक्यो, बो कोनी थाक्यो
अर, इंधारा में उजास जाग्यो
कोमल मनडा घर करगी बात
फिर घिर आयी बा काळी रात
कैवत नै सांच समझ बैठयो
मनडै संकल्प री बाती बाळ
बो सांची दिवलो बण बैठयों
जद बगत री आंधी चाली
दिवलै री बाती हाली
बाती रो साथी बण ज्यूं-ज्यूं
आतमबळ आगै आयो
बै काळी-पीळी आंधियां भी
अपणो वेग बढायो
थाकी बाती जद निठग्यो तेल
यूं लाग्यो खतम हुयग्यो खेल
पण दिवलो अजै नही दूटयो
अर ना ही बाती हुई खतम
तेल करम अर बळ रो पूरियो
बै बळया, मिटियो नीं जद तक तम ।
