भारत की संस्कृति के लिए... भाषा की उन्नति के लिए... साहित्य के प्रसार के लिए
दृढ़ संकल्प / राम सिंहासन सिंह
Kavita Kosh से
दृढ़ संकल्प अगर हौ मन में
कौनो रोक न पयतौ
भीसन आँधी अन्धड़ आके
अपने ही थम जयतो
मनुआ के ताकत तू देखऽ
समझऽ ओकर भासा
कभी न टिकतय एकर आगे
कौनो घना कुहासा
तन के ताकत बड़ा छीन हौ
मन के ताकत जानऽ
बड़ा समुन्दर हौ ताकत के
मनुआ में पहचानऽ
जे भी काम बड़ा कैलन हे
मनुआ से हथ कैलन
पूरा भेल तभी सब सपना
जब संकल्प जगैलन।
मन के सक्ति बढ़ावऽ आबऽ
पथ पर कदम बढ़ाबऽ
जीवन के हर डगर-डगर पर
सच्चाई अपनावऽ
सत्यब्रती के आगे पथ पर
रहई न कोनो घेरा
ओकरे मन के ताकत से ही
मिटतइ घना अन्धेरा।।
