भारत की संस्कृति के लिए... भाषा की उन्नति के लिए... साहित्य के प्रसार के लिए
दोहा - 4 / रत्नावली
Kavita Kosh से
भलें होइ दुरजन गुनी भली न तासौ प्रीति।
विषधर मनिधर हू रतन, डसत करत जिमि भीति॥
भल इकिलो रहिबो रतन, भलो न षल सहवास।
जिमि तरु दीमक सँग लहै, आपन रूप बिनास॥
घी को घट है कामिनी, पुरुष तपत अंगार।
रतनावलि घी अगिनि को, उचित न सँग विचार॥
आलस तजि रतनावली, जथासमय करि काज।
अबको करिबो अबहि करि, तबहि पुरैं सुष साज॥
रतनावलि उपभोग सों, होत विषय नहिं सांत।
ज्यों-ज्यों हवि होमें अनल, त्यों-त्यों बढ़त नितांत॥
