भारत की संस्कृति के लिए... भाषा की उन्नति के लिए... साहित्य के प्रसार के लिए
नई नई चूरिया मंगाय दे मुरहुआ / बोली बानी / जगदीश पीयूष
Kavita Kosh से
नई नई चूरिया मंगाय दे मुरहुआ
धानी रंग चुनरी ओढ़ाय दे मुरहुआ
पनवा के बिरवा म जिभिया चटाइ के खवाव मोरे राम
निमिया के पेड़वा म डाइ के झुलनवा झुलाव मोरे राम
अपने लबरवा पै होई थ निछावर
अपने भतार पै लगाइ थ महावर
कनिया म लइके कदमिया कै डरिया चढ़ाव मोरे राम
निमिया के पेड़वा म डाइ के झुलनवा झुलाव मोरे राम
लरिका हमार न खेलावे दहिजरवा
चुल्हवा जौ बारी त मेल्हाय मेंहदरवा
गहना कि ताईं हम गलवा फुलाई तू मनाव मोरे राम
निमिया के पेड़वा म डाइ के झुलनवा झुलाव मोरे राम
लगतै सवनवां म ठुमकै मुरैला
जाइ नैहरवा न देइ गन्धैला
पेटवा से भारी मोर गोड़वा मोटाय सोहराव मोरे राम
निमिया के पेड़वा म डाइ के झुलनवा झुलाव मोरे राम
