म गाउँछु विप्लवयुक्त गाना उठाउँछू शोषकको खजाना
हटाउँछू दीन र हीन रात म ल्याउँछू स्वर्णिमको प्रभात ।
नयाँ गवैया म नयां गवैया ।
हजारको रोदनले भरेर म गीत गैह्रो नित गाउँनेछु
दुःखीहरूको दुखमा रहेर उद्विग्न भै नित्य रमाउँनेछु ।
विवेक नै शोषकको लुछेर म नृत्य नै पागलझै रचेर
म दुःख-रोगादि सबै बढार्छु म धेर नै थोरविषे उचाल्छु ।
नयाँ गवैया म नयाँ गवैया ।
हजारको मानव-मन्त्र खोजी हजारको उज्ज्वल भाग रोजी
हजारलाई सँगमा लिएर म गाउँदै सम्मुख आउँनेछ ।
विरोध जाली निज औ पराई इ बाबु आमा अनि दाजु-भाई
कुटुम्बले यो वसुधा सजाई गर्दै पुकारा म त गाउँनेछु ।
नयाँ गवैया म नयाँ गवैया।
घाँसीहरूका पिरमा मिलाई आफ्नो म सङ्गीत सुनाउनेछु
सत्रस्त लोहारसँगै उडेर स्वदेश आमा म बनाउनेछु ।
सधैँ सिकर्मीहरू साथ लागी हतारिदै अर्घ्य चढाउनेछु
पानी नुनीलो श्रमको पिएर सुखी डकर्मीसित गाउँनेछु ।
नयाँ गवैया म नयाँ गवैया ।
बोक्ने म ढुङ्गाहरूका पहाड हजार आमा-बहिनी अँगाली
उदासको हो कि उदारको हो सुरम्य संगीत म गाउँनेछु ।
नयाँ गवैया म नयाँ गवैया ।
………………………………..
(भारती,, २।११,, वैशाख २००८ )