भारत की संस्कृति के लिए... भाषा की उन्नति के लिए... साहित्य के प्रसार के लिए
ना जाने जे अँखिया में केतना ले लोर बा / जगदीश ओझा ‘सुन्दर’
Kavita Kosh से
ना जाने जे अँखिया में केतना ले लोर बा।।
प्यारी-प्यादी अँखिया में कारी-कारी पुतरी
पलक का खोंता जइसे झाँकेली कबूतरी
जेतने छलके भरि-भरि आव ओतने
ना जाने नयनवाँ में केतना हिलोर बा।।
नन्हीं मुटी जियरा के केतना अहेरिया
करेले अहेरि भैया दिन-दुपहरिया
सहत-सहत वार थाकली जिनिगिया
ना जानि करेजवा में केतना मरोर बा।।
जोहत-जोहत बटिया दिनवाँ सिरइले
पिअत-पिअत रस मन ना अघइले
ना जाने मिलनवाँ के राति बाड़ी केतना
ना जाने बिरहवा के केतना ले भोर बा।।
चनवाँ-सुरुज कवनो काम नाहीं अइहें
जहिया ए जियरा के दियरा बुतइहें
जब ले परनवाँ बा, तबे ले बटोर बा
जबले सनेहिया बा, तबे ले अँजोर बा।।