भारत की संस्कृति के लिए... भाषा की उन्नति के लिए... साहित्य के प्रसार के लिए
पावस के घन / अनिल शंकर झा
Kavita Kosh से
आशा में ताकौं निहारौं गगन,
कोन देश भुतलैलै पावस के घन?
धुरदा सें अटलोॅ छै महलो-अटारी,
जादुगर खोलनें छै फणिधर पेटारी।
गाछी के पात-पात मदहोश, हतभाग,
धरती नें मांगै जल करतल पसारी।
प्याल विष झुलसाबै रही-रही तन,
कोन देश भुतलैलै पावस के घन?
सुखलोॅ छै नदी-नाल, खाली छै ताल,
कोटर में बंद बिहग पूछै सबाल।
हवा आरो सूरज के कैहनोॅ ई होड़,
गर्मी नें धीरज के बाँही मरोड़।
पूछै, कहिया तक सहबै ई जलन?
कोन देश भुतलैलै पावस के घन?
जागै छै दुपहर तेॅ औंधै छै गाँव,
टुकुर-टुकुर ताकै छै बरगद के छाँव।
बिन्डुवोॅ अन्धड़ में भुतहा बैहार,
बरसें रे निर्मोही ई रं नै मार।
धरती केॅ जीवन दे हरसाबें मन,
कोन देश भुतलैलै पावस के घन?
