भारत की संस्कृति के लिए... भाषा की उन्नति के लिए... साहित्य के प्रसार के लिए
पिया आगिन छै धूप / ऋतुरंग / अमरेन्द्र
Kavita Kosh से
पिया आगिन छै धूप।
ताम्बा सन होय गेलोॅ सोना के रूप
पिया आगिन छै धूप।
खस केरोॅ बेनिया लै बेनिया डुलाबोॅ
चन्दन के निकची सें छप्पर छरावोॅ
बाँसोॅ के ठाठ-काठ लाघै बेरूप
पिया आगिन छै धूप।
कहियो नै तोरासें कुछबो माँगलियौं
लानोॅ आय चन्द्रमणि भिक्खे में बोलियौं
खनवावोॅ ऐंगन्हैं में पोखर आ कूप
पिया आगिन छै धूप।
रेशम रोॅ झालर चँदोवा चँदनियाँ के
हमरे नै इच्छा छौं, छेकौं बहिनियाँ के
टाँगोॅ कि लागै ई धूपो अनूप
पिया आगिन छै धूप।
30.4.2000
