भारत की संस्कृति के लिए... भाषा की उन्नति के लिए... साहित्य के प्रसार के लिए
पूर्वी गीत नीयन रचल बाड़ू तू हमरा में / परिचय दास
Kavita Kosh से
भोर के बेला में तोहार इयाद आइल
बेर-बेर, कई बेर।
तूं स्मृतियन में रचल बाड़ू
पूर्वी गीत नियन
बनारस के ठुमरी नियन
केवड़ा के जल के फुहार नियन
तूं उपस्थित बाड़ू हमरा जीवन के संपूर्ण में
कठिन आ विचलन भरल दिन में।
चूल्हा के धीम आँच नीयन
निरी चमत्कृति आ ठंडी भावुकता से अलग
सौजन्य के आंतरिक रेखा बाड़ू हमरा खातिर।
दिन के ताज़गी नियन रमल रहेलू तूं हमरा में
कोनो साधु के सात्विक धूनी नियन
हमरा अंत: स्थल में
चित्रित हो गइल बाड़ू
कौनों कोहबर नियन।
