जनवरीअ जी रात-
हा इन रात जां
लंबो, अकेलो
सर्दु आ हीउ हालु
जंहिं में नरम ऊनी बिस्तरनि ते
चादरुनि जे रूप में
बेसुर्ति ऐं बीमार चांडोकी
मरीजं़नि खे भरे आगोश में
लेटी पेई आ...!
हर दरीअ दरवाजे़ रोशनदान जा
चप बन्द आहिनि
हाल में आ सांति
ऐं गहरो सन्नाटो...!
हाल खां ॿाहिर फ़िज़ा ठिठुरी रही आ,
राति ॿारियो आ उफ़क़ वटि,
बर्फ़ जो झीणो चराग़
(हाइ जंहिंजी लाट में भी
आहि सिल्ह जोदागु)
जंहिंजे ख़ौफ़ खां
या सर्दु नज़रुनि खां ॾकी
हर दिशा मजबूर, बिल्कुल दूर
थी सोढ़ी संघोड़ी
कीअं न वेठी आ लिकी कंहिं कुंड में!
उफ़, उघाड़ी भूंइ जे
नंगे बदन ते आसमां
चांदनीअ जी बर्फ़ उछिलाए रहियो आ...।
अॼु हवा जूं भी मुठियूं आहिनि भिकूड़ियल,
हा, कॾहिं सरदीअ विचां
उन जा भिकूड़ियल डं/द भी
ठिड़िकण लॻनि था!
चांदनीअ जी बर्फ़
ॿाहिर
हल्की सन्हिड़ी बर्फ़
चुभन्दड़ बर्फ़
अन्दर-
हाल में
नरमु ऊनी बिस्तरनि ते
मारफ़िया ऐं पैथेडिन जे बर्फ़ हेठां
दर्दु ॼणु आहे दॿियलु!
दर हक़ीक़त आपरेशन वक़्ित
चीरियल पासिरियुनि में
गहरो गहरो दर्दु
ऊन्ही पीड़, चुभन्दडु सूरु आ,
जंहिं सबब हीअ सांति
कंहिं वक़्ित किंझण थी लॻे
गहरो सन्नाटो
कुझु घड़ियुनि लाइ कीकिराइण थो लॻे।
नरमु ऊनी बिस्तरनि ते
अधमुई बेहोश चांडोकी
अचानक छिर्कु मारे थी उथे...!
लेकिन हिते हर दर्दु
बाग़ी दर्द खे
रोके रखण लइ आ खड़ो
हर वक़्ित पहिरेदार - कोडोपाइरिन!
............................
..............................
वक़्तु पंहिंजा पर पखेड़े
कंहिं अॼातल देस ॾे
उॾिरी रहियो आ -
रात जो पोयों पहरु पिणि
पीरसन बीमार जां ढुरिकी रहियो आ -
हाल जो हर हिकु मुलाज़िम हाणि
कुरिसीअ जे डिघियुनि ॿांहुंनि
(ख़ुलासीअ हंज) में गुम थी वियो आ...!
सांति भी हिन वक़्ित बिल्कुल सांति आहे
मार्फि़या जा अणचिटा चिचिड़ियल
अधूरा ऐं मुंझियल सुपना
बिनह बेसुर्ति आहिनि,
दर्दु पिणि आ निंड में
पीड़ पिणि आ निंड में
‘निंड’ पिणि आ निंड में...
हाल में हिन वक़्ित बाक़ी
कंहिं सॿाझीअ नर्सि वांगुरु
हल्की साई रोशनी
जाॻी रही आ...!
(3.7.1964)