भारत की संस्कृति के लिए... भाषा की उन्नति के लिए... साहित्य के प्रसार के लिए
प्रतिरक्षण / गीता त्रिपाठी
Kavita Kosh से
भत्किरहेछन् जिन्दगीका लयहरू
थुनिएर बचाइका प्रतिध्वनिहरू आफैभित्र
स्थिर भएका छन् सृष्टिका अनुरागहरू ।
अनपेक्षित प्रहारहरू
प्रक्षेपणको अन्तिम प्रतिस्पर्धा गरिरहेछन्
मृत्युको बजार थापेर
जीवनदेखि भागिरहेका उपचारकेन्द्रहरू
भयका अनाम वार्षिकीहरू मनाइरहने तयारीमा छन्
र
मूल सडकमा ज्यानको बाजी लगाएर दौडिरहेका एम्बुलेन्सहरू
छोडिआउँदै छन् भाइरसको स्याम्पल,
पशुपतिको प्रयोगशालामा ।
महाप्रलयको मिति तय गर्न
समयको पात्रो पल्टाइरहेका अनादिदेव
उदासी देखेर महामायाको अनुहारमा
सोचिरहेछन् कि उपाय,
प्रलयातीत प्रतिरक्षणको !
