भारत की संस्कृति के लिए... भाषा की उन्नति के लिए... साहित्य के प्रसार के लिए
प्रश्न / रूप रूप प्रतिरूप / सुमन सूरो
Kavita Kosh से
नद्दी के पानी रं दरबनियाँ देने
कहाँ जाय रहलोॅ छै लोग?
कोनी पहाड़ोॅ पर छै एकरोॅ गंगोत्री,
कोनी समुन्दर सें जोग?
मटमैलोॅ जिनगी के सुरता नै तनियों-सा
कदा सें, किच्चट सें नेह।
सबटा अतीतोॅ के निर्मलता बिसरी केॅ
लटसट गुमानोॅ सें देह।
कत्तेॅ दिन पैहने सें फुटलोॅ छै ई सोता
कत्तै दिन लम्बा छै बाट?
कहिया सें गिरलै कदोड़ोॅ में आबी केॅ
कहिया सें फँसलै बेघाट?
मनोॅ में घुमड़ै छै अकुलैलोॅ प्रश्न एक
सद्दोखिन औंटै छै प्राण
सोचै छीं ठाढ़ोॅ किनारा में लागी केॅ
के करतै एकरोॅ निदान?
