भारत की संस्कृति के लिए... भाषा की उन्नति के लिए... साहित्य के प्रसार के लिए
प्रार्थना / आद्याशा दास / सुमन पोखरेल
Kavita Kosh से
मेरो प्रार्थना
नितान्त निजी, अत्यन्त गोपनीय
व्याकुल, दुःखमय
एउटा उत्कट अनुनय
एउटा सम्मोहक अनुरोध
पुनर्जीवित गर्न मेरै रहर, आकाङ्क्षा र कामनालाई
केवल मेरालाई, मेरै मात्रलाई ।
दैनिक कामहरूका बीच
दिन उक्लिँदै गएर साँझ होउन्जेल
मन्दिरका अग्ला द्वारहरूमा
भान्सा र सुत्ने कोठाबीच ओहोरदोहोर गर्दैगर्दै
कुनै पनि ठाउँमा, जुनसुकै ठाउँमा
ज्यूँदाउँछ मलाई मेरो प्रार्थनाले
पूरा गरिदिन्छ मेरा ईच्छाहरू ।
कति सहज प्राप्त छौ मौन-ढुङ्गो झैँ मौन तिमी
कहिल्यै नबोल्ने नियति लिएर
मलाई, र अरू सबैलाई
बाँड्दै सम्मतिको भ्रम
नरिवल, कपडा र
जीवन भनिने बत्तीको एउटा चम्किलो सलेदोको साटोमा ।
