भारत की संस्कृति के लिए... भाषा की उन्नति के लिए... साहित्य के प्रसार के लिए
प्रेमको मृत्युमा एउटा श्रद्धाञ्जली / मौन आवाज
Kavita Kosh से
मैले सहेको थिएँ
एकतर्फी प्रेमको चौतर्फी यातना
सहेको थिएँ असंख्य पीडा !
थाहा हुनुभन्दा पहिले थाहा थिएन
दुख्दोरहेछ घाउ !
मैले सहेको थिएँ
बिना वस्त्र नाङ्गो शरीर
सहेको थिएँ अनन्त जाडो !
दुख्नुभन्दा पहिले थाहा थिएन
दुख्दोरहेछ घाउ !
पुग्न हिँडेको थिएँ
नपुग्दै फर्कनुपर्ने ठाउँमा
नभएको बाटो
नरहेको गल्ली / दोबाटो र बस्तीमा !
थाहा हुनुभन्दा पहिले थाहा थिएन
थाहा हुनुपर्ने धेरै कुरा !
जे होइन त्यही
जे छैन त्यही
छायाँको छायाँ खोज्दै
म यहाँ आइपुगें !
आकाशभन्दा अलिमुनि
धर्तीभन्दा अलिमाथि
यतै कतै म आइपुगें !
मैले जे जे सम्झनुपर्ने हो त्यही त्यही बिर्सिएँ
मैले जे जे बिर्सनुपर्ने हो त्यही त्यही सम्झिएँ !
यादहरूको पहाडमा उभिएर
तिमीलाई मैले सम्झिएँ !
- त्यहीँ थियो प्रेमको मृत देउराली
जहाँ मैले आँशुका केही फूलहरू चढाएँ !
०००
