भारत की संस्कृति के लिए... भाषा की उन्नति के लिए... साहित्य के प्रसार के लिए
फगुआ / चन्द्रमणि
Kavita Kosh से
नाधिन तिनक धिन नाधिन तिनक धिन
बाजि रहल मृदंग रे
बिनु पिउनहि फगुआमे मनुआ नाचै
मोर मत्तंग रे।।
नवरंगक परिधान पहिरिकऽ
धरती गगनकें नौंते
खेत-खेत मुस्कान सुमनकें
गुज्जिंत अलिकुल सौंसे
छमकि गुजरिया चलै डगरिया चुनरी रंग बिरंग रे।।
जोहि रहल जे बाट पियारी
प्रियतम के मासो सँ
प्रेम-सिंधुमे डूबि रहल अछि
प्यासल जे बरिसो सँ
मर्यादा छथि बिसरल सबटा कृष्ण राधिका संग रे।।
पिचकारी दै प्रेम फुहारा
सबतरि लाले लाल
रगड़ि गुलाल लालकय देलनि
भइया भउजीक गाल
उमरि गेलै आवारा यौवन सबठाँ एकहि रंग रे।।
घर-घर मे उत्सव केर बेला
गमकि बेलै पकवान
जन-जनमे अछि प्रेम समायल
कण-कण में भगवान
रहल केओ ने राजा रानी आइ केओ ने रंक रे।।
