फागण रा रंग डिंगल रै संग / दीपसिंह भाटी 'दीप'
मास फागण मोहणो मन, जड़ज चैतन जोश।
रूंख फालै साख रूड़ी, मानखो मदहोश।
तो उदघोस जी उदघोस, सुरंगी रुत रो उदघोस।।1।।
खिलै कळियां फलक खोलै, भंमरां भणकार।
रस चूसत भमैह रसिया, पाळवा थिर प्यार।
तो रसधार जी रसधार, कुदरत लुटावै रसधार।।2।।
वृंदवन में कान विचरै, सुघड़ राधा संग।
गोप गोपी मगन गावै, रास रवमय रंग।
तो अरधंग जी अरधंग, राधा साम री अरधंग।।3।।
डांडिया भरपूर डणकै, ढमक बाजै ढोल।
गैरिया गणणाट गमकै, रमत घण रमझोल।
तो धमरोल जी धमरोल, उडैह खैह रा धमरोल।।4।।
गांव गळियां गीत गूंजै, राग फागण रंग।
ढाणी रमत ढोल ढमकै,मुखर धुन मड़दंग।
तो उछरंग जी उछरंग, हिवड़ै छावियो उछरंग।।5।।
नार नर सब निडर नाचै, उमंँग भर भर अंग।
मौज मस्ती मिनख मचलै, चोट पडतां चंग।
तो हुड़दंग जी हुड़दंग,माचै होळियां हुड़दंग।।6।।
प्रेम रस औमाव पूरण, सजन सजनी संग।
भर्ये हिवड़ै बदन भीनै, रमै होळी रंग।
तो सतरंग जी सतरंग, फागण आवियो सतरंग ।।7।।
प्यारी धण रा रंगै पीया, गौर बरणा गाल।
हेत समंदर लै हबोळा, प्रीत बांधै पाल।
तो हेताळ जी हेताळ, जोड़ी जबर री हेताळ।।8।।
भला देवर नणद भावज, टाबरां री टोळ।
धुलेंडी रो उडै धमचक, रंग में रगदोळ।
तो ठिठठोल जी ठिठठोल, हासा मसखरी ठिठठोल।।9।।
रीत उजवळ रंग राचै, प्रेम रस पिचकार।
भेदभावां भींत भागै, प्रखर पसरै प्यार।
तो बौछार जी बौछार, बरसै नेह री बौछार ।।10।।
लाल चूंदड़ ओढ़ लचकै, कळहळाता कैर।
रोहिड़ां रा फूल राता, महकै चहूं मेर।
तो लख लैर जी लख लैर, कुदरत कोख में लखलैर।11।।
हरणकुस री बैन होळी, लखण कीधा लाख।
पैलादे रो परस पाए, खला हुयगी खाख।
तो अखियात जी अखियात, भगत पैळादो अखियात।।12।
दंभ आळस दोस दुरगुण, होळी मांहि होम।
मांहि राखो मिनखचारो, कस्ट उबरै कौम।
तो हरिओम जी हरिओम, समरो रात दिन हरिओम।।13।।
अडग ऊभा सीम ऊपर, धरा भारत धीश।
रगत रंगांह गैर रमै, समर बगसै शीश।
तो धरणीश जी धरणीश, फौजी रांगड़ा धरणीश।।14।।
कोयलां वनराय कुहकै, हरियाळी हमेस।
विड़द फागण 'दीप' वरणै, सांवठो संदेश।
तै मरुदेस जी मरुदेस, वाल्हो हिवड़ै मरुदेस।।15।।
