भारत की संस्कृति के लिए... भाषा की उन्नति के लिए... साहित्य के प्रसार के लिए

फूठरापौ / चंद्रप्रकाश देवल

Kavita Kosh से
यहाँ जाएँ: भ्रमण, खोज

कदैई
कठैई अेक उणियारौ जोयौ हौ
सावळ-साख्यात

इत्ता बरसां पूठै आज
अेच-बेच रा लेहरावै उणरा कुंतळ
फूलां रा झाड़ ज्यूं
फूलै है वारंवार
ओळूं रै आर-पार

कालै कदास वांरी सौरम आवै
पिरसूं स्यात गाल माथै वांरौ परस सरसरावै
धकलै किणी दिन म्हारै खांधै
छूटयोड़ौ खोहरा रौ दांणौ लाध जावै।
धवळौ-कंवळौ
छोटोसोक-अेटम
जिकौ किणी ई बगत
म्हारी आतमा में धंस परो फूट जावै
इण सूं पैली
सगुण के निरगुण
किण खोळ्यै फूठरी फबै थूं
मन नै इणरौ कूंतौ व्है जावै
बस
इतीक-सी आयस री दरकार
अर उण औसर री उडीक है।