भारत की संस्कृति के लिए... भाषा की उन्नति के लिए... साहित्य के प्रसार के लिए
बारा मैनौ की छः होली रितु / ओम बधानी
Kavita Kosh से
बारा मैनौ की छः होली रितु, ।
सूणो दिन य कस-कन बितो
चैेत फुलारी डेळ्यों सजाला,बेटुला रम्म-झम्म मैतुड़ा आला ।
बैसाख मेळा थौळौं जौंला,स्ंवाळि पकौंला पापड़ी उमी भड़्यौंला ।।
जेठ पुंगड़्यों औख्खि छ धाण,भक्कु होंदु भारी लगद भमाण ।
ऐगे असाड़ लौंकि कुयेड़ी,स्वामि खुद मा झुरी जिकुड़ी ।।
रूझालु गात सौण धणमण ,अंसधारि टप-टप लगद रणमण ।
भादौं कखड़ी मुंगर्यों कि बार,साग पातैलगुली लकदक हफार ।।
ल्हैगे असूज नौ नवाण,पितरू चढैक तब अफु खाण ।
घर सजौंला तैका चड़ौंला,कातिक बगवाळ भैला नचैंला ।।
फरफरांदु ह्यूंद ल्यैकि मंगसीर एैगे,गैल्याणि हैंसणी मै तरसेंदु रैगे ।
पूस कि राती औख्खि छ स्वामी,घर आवा झट्ट न करा बेकामी ।।
मौ कि मकरैण गंगा नह्यौंला ,देवि देवतौं क दरसन पौंला ।
जिकुड़्यों उलार फगुण ल्हैगे,अबीर गुलाल मुखड़्यौं मनु रंगैगे ।।
