भारत की संस्कृति के लिए... भाषा की उन्नति के लिए... साहित्य के प्रसार के लिए
भरोसैमंद आखर / नंद भारद्वाज
Kavita Kosh से
म्हैं अहसानमंद हूं
मिनखपणै रा वां मोभी पूतां रो
जिकां री खांतीली मेधा
अर अणथक जतन
अमानवी-यातनावां सूं
गुजरतां थका
भेळा कर पाया है कीं
भरोसैमंद आखर
जिका
आपां री भटक्योड़ी उम्मीदां साथै
जुड़ता ई
खोल सकै एक नूवों मारग
एक जीवंत लखांण
परतख
अर असरदार
किणी धारदार हथियार री भांत
वै चीर सकै अंधारै रो काळजो
मुगती दिरा सकै
तळघर में कैद उण उजास नै
जिको दे सकै आंख्यां नै नूंवी दीठ
ओप उणियारां नै
एक अछेह आतम नै विस्वास-
जिण रै परवाण
उण ‘दयानिधान’ री
नीयत पिछाणी जा सकै ।
