भारत की संस्कृति के लिए... भाषा की उन्नति के लिए... साहित्य के प्रसार के लिए
भव री बाट / राजू सारसर ‘राज’
Kavita Kosh से
ढळलै दिन
सूरज री किरणां पडै
पळपळाट करै सुरजी
पीळांस बधै
उपरां कर उडती
पांखीड़ां री डार
तणकावै भावां रा तार
मन आकळ बाकळ होय’र
कैदीडै पांखी ज्यूं फड़फड़ावै
अेक ई सांस उड’र
बठै जावणो चावै।
धंवर सो धुंधळास
छायौड़ो दीखै च्यारूंमेर
निजरां री पण टेर
तीखै तीरां ज्यूं गैरी बैठणी चावै
उण माटी रा गूंगा सबद
बांचणां चावै।
वो म्हांनै बुलांवतों लखावै
उण कनैं है कोई दरसण
वो बतोवणांे चावै
हो सकै कोई गूढ सवाल
म्हासूं पूछणों चावै।
म्हैं सोचूं,
काईं-काईं मिल सकै है बठै
उतार चढाव, रीत गीत
जीवण-मरण
स्सो कीं, कै कीं नीं
म्हैं सोचूं, पण साच जाणूं नीं।
