मां उहो नाहियां / कीरत ॿाॿाणी
मां उहो नाहियां
जंहिं खे चओ था
नालो बिन आहे,
चेहरो बि न आहे।
मूं पहिरियों भेरो गुफ़ाउनि में,
पंहिंजनि उॾामन्दड़ ख़्वाबनि खे
सोघो झले,
ॾिनो हो पथर में परवाज,
ऐं ॾिठी हुअमि
खीर भरिये सुबूह जी पहिरीं बाख।
मूं ॾिठो हो,
कुदरत जे नंगाइप जो
तांडव नाचु,
ऐं उन खे पंहिंजे ज़हन जे मुद्राउनि सां
ॾेई सुर ऐं ताल,
ढाले छॾियो होमि,
हिक सुन्दर नृत्य में।
मूं सरकश पहाड़नि खे फाड़े,
वहाई हुई सोनी धारा,
समुंडनि जे सीने खे चीरे,
मुंहिंजियुनि किश्तियुनि ॾिनी हुई,
हिन गोले खे परिक्रमा,
मुंहिंजे ”ज़हन जा पखी“
उॾाणा हुआ,
हिन बेपनाह आकाश जे,
नीले ग़ालीचे ते
चंड ऐं तारनि जो लहण वाउ-समाउ।
मुंहिंजे शान ऐं इक़्तदार जा
निशान ऐं रेखाऊं-
मोहन जे दड़े में दॿियल,
अजन्ता ऐं एलोरा जे पथरनि में उकिरियल
मिस्र जे पिरामिडनि में इज़हारियल-
इन्हनि जे बुलन्दीअ खे ॾिसो,
रोम जे देवलियुनि में
उन्हनि जी महानता ॻोल्हियो,
चीन जे दीवार ऐं पीसा जे मुनारे में,
उन्हनि जो दर्शनु पायो।
मुंहिंजी दहशत जो दॿदॿो
सल्तनतशाहीअ जे
दॿियल खंडहरनि अन्दर ॻोल्हियो,
ज़ार जे उलट थियल तख़्तगाहनि में,
मुंहिंजी शक़्ती परूड़ियो,
वियतनाम जे झंगलनि ऐं खेतनि में,
ॿालकनि जे ताणियल बंदूकुनि
जे महकम नालियुनि मे,
मुंहिंजे रूह खे ॾिसो।
हर मकान ऐं ज़मान में
भुरन्दड़ दीवारियुनि में,
मुंहिंजनि निशाननि खे परूड़ियो।
पेरनि में कड्यिूं ॿधी
मूंखे तव्हां विकियो हो,
बग़दाद ऐं बुख़ारा जे
खुलियल नीलामी मार्केटनि में,
डज़ननिऐं कोड़ियुनि जे हिसाब सां।
मूंखे ज़ंजीरुनि में जकिड़े,
लोही रसनि में ॿधी,
छिकायूं हुयूं अव्हां,
पथर जे फीथनि वारियूं गाॾियूं,
पंहिंजी अज़मत जो
नग़ारो वॼाइण लाइ।
माल जे ग़ोराबनि में सथे,
मूंखे अफ्रीका मां जलावतन करे,
अमेरीका जे खेतनि में
चहबूकनि जे घावनि सां,
अव्हां कयो हो
इनसानियत जो ज़नाउ (रेप)
अव्हां ॾिनो हो
मुंहिंजे रूह खे घोघो,
चाढ़े यसूअ खे सलीब ते।
रोम जे चौंकनि ते
”स्पार्टाकस“ जे
लटिकियल सरीर मां,
अव्हां पातो हो
शैतानी सुकून।
सुकरात खे ॾेई
ज़हर जो प्यालो,
अव्हां मुंहिंजी ज़बान खे,
कटे छॾणु चाहियो हो।
सखर जी जेल में,
ॾेई हेमूंअ खे
फासीअ जो हुकुम,
संदसि जुवान चपनि तां,
माता जे खीर जो संगीत
मिटाइणु चाहियो हो अव्हां!
मुंहिंजो ज़हन अञा सालिम आहे
मुंहिंजो रूहु,
करे पियो परवाज़,
मुंहिंजो कारवां
अञां भी आहे रवां,
जंहिं जे परचम ते
लहराए पियो पैग़ामु:
मां उहो नाहियां
जंहिं खे चओ था,
नालो बि न आहे,
चेहरो बि न आहे,
मुंहिंजो नालो इनसान आहे,
मुंहिंजो चेहरो अवाम आहे।
(लिकियो लियाका पाईनि-1999)
