मिल्दै मिलेन कुनै तालमेल / सानु शर्मा

मिल्दै मिलेन कुनै तालमेल करारसँग
तिम्रो खुसी पैसासँग, मेरो घरबारसँग

मनसँग मन मिले पो रमाउँछ मन
केको लालसा मनबिनाको दरबारसँग

यसै पनि छियाछिया मन बोकी हिँड्या छु
लाग्दैन डर मलाई, जाबो तरबारसँग

किनारा मलाई चाहिँदैन, उतार्न नखोज
जुध्ने बानी परिसक्यो मलाई मझधारसँग

फलामको पर्खाल फुटाई निस्कनेलाई
डर नदेखाऊ नाथे झिनो तारबारसँग

उही नै हो सबैभन्दा धेरै दुःखकष्ट दिने
के अपेक्षा राखौं र म, अब सरकारसँग