भारत की संस्कृति के लिए... भाषा की उन्नति के लिए... साहित्य के प्रसार के लिए
मेरौं कै जावा भेंठ / ओम बधानी
Kavita Kosh से
मेरौं कै जावा भेंठ आखीर
दिख्यौ न दिख्यौ अगनै फेर
जन्म भूमी य टीरी तुमारी
दिख्यौ न दिख्यौ अगनै फेर।
एक मा होंन्दी व जीन जन्म दिनी
वीं से भि बड़ी होन्दी जन्म भूमी
जन्म भूमी क मन की खातीर
मेरौं कै जावा भेंठ आखीर।
छप-छपी पड़ि जाली थमलु आंख्यौं कु पाणी
भुक्की प्यै लेली य भोळ क्य होन्दु कुजाणी
मुखड़ि दिखैक, कै जा नीर थीर
मेरौं कै जावा भेंठ आखीर।
तुमारा सुख क खातिर पाणि म मिलि जाणू ईंन
मा कु फर्ज अपड़ू निभै जाणू ईंन
तुम कर्यां न कर्यां फेर जातीर
मेरौं कै जावा भेंठ आखीर।
दिन दुयेक द्वी चार सांस रैगीन
भोळ समळौण्या ह्वै जाणू ईंन
चित्त बुझान तब देखी तस्वीर
मेरौं कै जावा भेंठ आखीर।
