भारत की संस्कृति के लिए... भाषा की उन्नति के लिए... साहित्य के प्रसार के लिए
मौन राख मलाई / युलिया घेरगेई / सुमन पोखरेल
Kavita Kosh से
मीठा शब्द र रसिला झूठ बोल्न नलगाऊ
मुख नसुकुन्जेल
घन्टौँ बोलिरहन सक्छु म ।
आफ्ना कानलाई मेरा अविरल प्रेमगीतबाट मुक्त गर्न
तिमी चुम्बनले मेरा ओठ छोप्न चाहने छौ ।
मौन राख मलाई,
तिम्रा आँखाभित्र हराइरहेका
मेरा आँखा मात्रसँग रहन देऊ मलाई ।
मीठा शब्द र रसिला झूठ बोल्न नलगाऊ,
हजारौँ शब्द छन् मसँग,
तिम्रो जीवनबाट दुःख पखाल्न सक्ने
र तिमीलाई प्रेमको रसमा डुबाइरहन सक्ने ।
बादल गुलाबी हुने
आगोका ज्वाला नीला र गोलाकार हुने
वर्षाको पानीले शरीरमा आइसक्रिमको सुवास पोख्ने
नयाँ संसार बनाउन नभन मलाई ।
मलाई पटक्कै नभन,
सक्न त सक्नेछु म ।
