भारत की संस्कृति के लिए... भाषा की उन्नति के लिए... साहित्य के प्रसार के लिए
म्हारा लाडला.. / मोहम्मद सद्दीक
Kavita Kosh से
म्हारा लाडला
थे हो मन्सूबे रा माळी
खाली क्यूं है थांरी थाळी
काया सम्मै सारू ढाळी
आगै रातां कोनी काळी
हळियो हाथां में ले हाळी
गावो नाचो दे दे ताळी
रे म्हारा लाडला ....
कूंपळ फूटै राख रूंखाळी
नावै रूखां नै तूं पाळी
आखर हिये में तूं राळी
दुनियां होगी जबरी जाळी
मत बण सूदी सी तूं छयाळी
कियां खावै तन्नै ल्याळी
लेकर लांपो मूंडो बाळी
रे म्हारा लाडला ...
अम्बर गाजै बीजळ कड़कै
छाती बैरीड़ां री धड़कै
जूनी पोळां बड़कै-बड़कै
चेतो अंगारो बण भड़कै
थारा भुजबळ जबरा फड़कै
बेगा जागो तड़के-तड़के
कसिया-हंसिया थारा खड़कै
रे म्हारा लाडला ...
थां रै खेतां में थै जाओ
हळिया हाथां सूं चलाओ
भैंस्यां गायां नै चराओ
पाणी ऊंटां नै भी पाओ
घर को धाको भी धिकाओ
मीठा अळगोजा बजाओ
बेटा घूघरिया घमकाओ
रे म्हारा लाडला ....
