राड़ रै ताण / मधु आचार्य 'आशावादी'

खेत री जमीन खातर
लड़ पड़िया हा
दोनूं भाई
रामियो अर स्यामियो।
कोरट मांय कर दियो मुकदमो
ब्यावं-मरण खतम
भाईपै री बातां मांय
नीं रैयो दम।
गांव आळा नेताजी नै बुलायो
भायां रो दुखड़ो सुणायो
भाईपै खातर मांगी मदद
नेताजी हुयग्या त्यार
अलग-अलग बातां सूं
केई महीना काढया
भाई जावता,हाजरी बजावता
ग्यान री बातां सुण
थोड़ा महीनां बांद
भायां रो झोड़ मिटग्यो
पूरो खेत ई
नेताजी रै नांव हुयग्यो।