रेत की क्वारी / सुन्दर नौटियाल
ब्याळि जख सैंणा पुंगूड़ा होन्दा थै
दै-दादू का कूड़ा होन्दा थै ।
आज फैंलि छ रेत ही रेत
पुरणा दानू का जिकुड़ा होन्दा थै ।
जख गोर चरौण पर गाळी हजार
बाटु लगाण पर मौ मार होन्द थै ।
खुट्टा रखण क सोचण पड़दू थौ
औडा सरकण सी दरबार होन्द थै ।
तीं माटी कू पत्ता नी आज
तौं डोखरू की हार डूबी गै ।
सेठू का सेठ्वाड़ा डूबी गै
गरीबू का घरबार डुबी गै ।।
रेतु का पत्थरू का ढांग लग्यां छ
खोजिक नी मिलणू माटू वा ।
बाटों का सड़क्यूं का यंू जाळु मा
हेरिक नी दिख्यणूं बाटू वा ।।
जै बाटा वू बखरा चरै क
गौड़ों भैंसों तैं चाल लिजांदू थौ ।
नी दिखेंदू वा धारू वा चाल
जख सुलार बटोळिक भैंसों भिजांदू थौ ।।
रेत का नीस क्यारी सग्वाड़
कुड़यों का गुठ्यार डुब्यां छ ।
पैली जौं देखिक चित बुझौंदा थै
तौं भवनों का खन्वार डुब्यां छ ।।
पर यनु नी की ये रेत भंडार सी
गौं वाळों कु क्वै सुधार न हो ।
शैरू बजारू मा घुमदा ज्वानु क
यू सुनहरू रोजगार न हो ।
उठौण वाळा त खूब उठौणा
फैदा यूं लोडू़ बाळू कू ।
बजरी माटू मिक्स होयूं छ
गदनों, नाळू, खाळू-खाळू कू ।।
क्वारी का टेंडर्र पड्यां छ
गंगलौडू़ कु भी मोल होयूं छ ।
क्वै ओनर छ क्वै डीलर छ
लखडौं मा भी झोळ होयूं छ ।।
झाडी़-झक्कड़, लखडू़ का ढेर
इथैं उथैं हौड़-डाळा पड्यां छा ।
सपसपी डाल्यौं की फांगी कखि
मोटा डाळौं क जड़ला उखड़्यां छा ।।
कश्मीरियों की चांदी होईं छ
थोकदारू की चिरवांत होणी छ ।
गेली चड्यीं छ डिल्वान्यों का घघरौट
कड़ी-पटेलु की सरवांत होणी छ ।।
गौं का ज्वान अब नौकरी छोड़िक
डरेबर और खचर्वाळ बण्यां छ ।
जनाना करणा मनरेगा की सरान
सैट दिखांदार नौन्याळ बण्यां छ ।।
क्वारी वाळा लाखों लाख कमाणा
खचर्वाळ कमाणा हजारों मा ।
डंपर, पिकअप, यलपी वाळा
रजण लग्यां गौं बाजारों मा ।।
लूट त यख दिन रात चलणी छ
पर डर कानून कु दिखलौणा छा ।
सब चोर पुलिस यख खेलणा अर
फैदा मजबूरू कु उठौणा छा ।।
ल्हसुरा बटोळना मा बिजी होयां सब
घाटों का अघोर होंया छ ।
लखड़ा भगांया जू मुर्दों संग
वों बेचणवाळा चोर होयां छ ।।
कनी लुटमार मचीं छा यख
जाणी क्वे कनक्वै लुटणू छा ।
ठेकेदारू का ठाठ होंया अर
गरीबु कु दम घुटणु छा ।।
