लुना, लङ् आइल्यान्ड साउन्डको माछा / युयुत्सु आरडी शर्मा
मेरो जीउमा विद्युतीय कम्पन गरायो
तिम्रो आदिम अनुहारले
तिम्रो ज्वालामुखी उत्पातहरूले
तिम्रो इतिहास हल्लाउने भीमकाय आकारहरू
र टल्केको जादुगरी ऐनाजस्तै
तिम्रो लामो पातलो जिब्रोको नुनले
टक्क छोयो मेरो मुटुका दुधिला सीमसारहरूलाई
एउटा इन्डियन सिकारीको भालाजस्तै, हन्टिङ्टन
फोर्ट जेफ्रसन, न्यु ह्यामेन, साउथ ह्याम्टन
समुद्रले गायो मेरा विस्मृत पूर्वजहरूका नामहरू
अर्ध जूनको आदिम उदय
समुद्री सिपीहरूको स्वर्गमाथि, डेविल्स वेल्ट ।
न्युयोर्कबाट आउने एक्सप्रेस रेलमा
मेरो छेउमा बसिरहेकी सपाट अनुहारकी
सेयरब्रोकर दुई टुक्रामा फाटिन् सिपीजस्तो
र, कायाकल्प भइन् एउटी गफाडी अप्सरामा
जुन बेला हामीहरूले प्रवेश गर्यौँ तिम्रो जीउमा
तिमी उभियौ मेरो छेउमा
तिम्रो जीउ नाङ्गो, झन्डै
तिम्रा गोरा हातहरू मेरो काँधमाथि र
तिमी परिणत भयौ ब्रह्मतालकी
सबै रङ भएका थरीथरीका माछाहरूमा
ब्लुफिस, स्ट्राइप, वटर फिस, विन्टर फ्लाइन्डर
एटलान्टिक साल्मोन फ्लुक, वटर फिस
मैले टिपेँ तिम्रा श्वासहरू हल्लिरहेका छालहरू
र बुनिरहें एउटा मन्त्र त्यसबाट
तिम्रो फोक्सोका प्यागोडाको नीलो सागरमा ।
एउटा कालो अलच्छिनी गीत गाइरह्यो
एउटा कालो चराले कवयित्री एन्सेक्स्टनजस्तै
नाघ्दै विस्तार विशाल ब्रह्मतालको
'राम्रो, राम्रो, ठीकै छ' भन्यौ तिमीले
तिम्रा नग्न छातीहरू
आमा हिमचुचुराहरूका भूमिमा पाहुना तिमी
जहाँ कुनै बेला एकल आत्माले छाक टारेको थियो
छुट्याउँदै चिप्ला ढुंगाहरू
र, बुनिरहेको अनवरत आफ्नै आत्माको गीत
कतिपय म्यानहाटनहरूबाट पर, निकै पर
'राम्रो राम्रो मायालु,' आयो एउटा स्वर
तिम्रा बाक्ला ओठहरू, मेरो मुखमाथि
अन्ततः आइपुग्यो आफ्नै घरमा
जुन शताब्दीयौँअघि देखेको थियो
सपनाहरूमा तिम्रो हल्लिरहेको कोक्रो
आक्रोशित इन्द्रधनुषहरूमा ।
