विकासो रो गाड़ी चलिये के रहतै / छोटे लाल मंडल
विकासो रो गाड़ी चलिये के रहतै
सीधे मुखिया के द्वारी पै लगतै,
घोषणा कैलकै नितीश सरकारें
पंचायती राज के भागीदार।
जहाँ आधो आधी मौगी मरद छै
जनता के वनौलौ छै हितकार,
कोय के पतनी कोय के पोतहू
सवके मरद ते वनलै पेशकार।
खरचा वरचा ते वढ़ैवै करतै
मोटर सायकिल दौड़वै करतै,
डीजल पैट्रोल जरवै करतै
सिगरेट पान भी खैवै करतै।
तरी घरी सव जानिये लेतै
जे हिस्सा छै मिलिये जैतै,
हेकरा कौवनै छोड़ावै पड़तै
भ्रष्टाचार के केना भगैतै।
हम्में देखै छी सहे छै हाल
भरो जेवी ते फुलावो गाल
कर्मचारी सव छै मालो माल
हम्मै जनता छीयै कंगाल।
केना के होयतै घूसखोरी वंद
लाख लाख रूपा चुनावी जंग,
दमन करी के वोट लुटनें छै
की खुशियाली छै तंगे तंग।
दोष मढ़ै छै लालू रावड़ी के,
कांग्रेस जेना के पहिनें छेलै,
तेन्हैके झलकै सहै पवैया,
की मुखिया घर गाड़ी अैलौ।
वापें पुतें पंच वनलो छै
ठीकेदारी में आप सटलों छै
तीन हिस्सा ते अलगें अलगें
चौथैया में निर्माण भेलो छै।
कत्ते के कहवौ कत्ते सुनैवौ
वलिहारी छै सरकारो के
अमला कपला पेट फुलावै
हमरा के सुटकावै छै।
