2,247 bytes added,
14:57, 27 अगस्त 2012 {{KKGlobal}}
{{KKRachna
|रचनाकार=पद्माकर
}}
कूरम पै कोल कोल हू पै सेष कुंडली है ,
कुंडली पै फबी फैल सुफन हजार की .
कहै ‘पदमाकर’ त्यों फन पै फबी है भूमि ,
भूमि पै फबी है थिति रजत पहार की .
रजत पहार पर सम्भु सुरनायक हैं ,
सम्भु पर जोति जटाजूट है अपार की .
सम्भु जटाजूट पै चंद की छुटि है छटा
चंद की छटान पै छटा है गंगधार की . १.
बिधि के कमंडलु की सिद्धि है प्रसिद्धि यही,
हरि- पद- पंकज- प्रताप की लहर है .
कहै ‘पदमाकर’ गिरीस – सीस - मंडल के ,
मुंडन की माल ततकाल अघहर है .
भूपति भगीरथ के रथ को सुपुन्य पथ ,
जह्नु –जप-जोग-फल-फैल की फहर है.
छेम की लहर , गंगा रावरी लहर ,
कलिकाल को कहर, जम जाल को जहर है .२.
जमुपुर द्वारे , लगे तिनमें केवारे ,
कोऊ हैं न रखवारे ऐसे बन के उजार हैं .
कहै ‘पदमाकर’ तिहारे प्रन धारे,
तेऊ करि अधमारे सुरलोक को सिधारे हैं .
सुजन सुखारे करे पुन्य उजियारे ,
अति पतित कतारे भवसिंधु तें उतारे हैं .
काहू ने न तारे तिन्हैं गंगा तुम तारे ,
और जेते तुम तारे तेते नभ में न तारे हैं .३.
</poem>