भारत की संस्कृति के लिए... भाषा की उन्नति के लिए... साहित्य के प्रसार के लिए
वौ दिन / चंद्रप्रकाश देवल
Kavita Kosh से
अेक दिन
इण अचेत नींद सूं ओझक परौ
चांणचक जागूंला
अर अेक दीवौ जुपाय
भाखर री जड़ां में धर आवूंला
जठा सूं रळक परी जलमै नी
जिकी जमीं रौ खार
धोय-धाय
समदर नै सूंप आवै
अेक दिन
म्हैं म्हारै घर नै सैमूदौ
ताजिया री बारी नीचैकर काढणी चावूं
म्हारौ घर बाळक नीं तौ कांई व्हियौ
निजर तौ उणरै ई लाग सकै
पछै धकलै बरस इळा नै काढण री सोचूंला
आं दिनां म्हारी आतमा
धरम सूं बेसी टोटकां माथै भरोसौ करै
इतियास सूं ओक्या बैठगी
संस्क्रति रा भूतिया बिखेरै है बजार जैड़ी केई चीजां
कळा उछबां रै खाडै थरकीजगी
ओळूं रौ सरणौ अखै
अेक दिन
ओळूं री जड़ां
परापरी में धंस परौ अटकळूंला
वौ दिन उडीक
म्हारी रचना
उडीक!
