भारत की संस्कृति के लिए... भाषा की उन्नति के लिए... साहित्य के प्रसार के लिए
शरद / रामनाथ पाठक 'प्रणयी'
Kavita Kosh से
शरद के लहँगा लहराइल।
बज उठल केकर दो पायल,
के दो मुसुकाइल।
शरद के लहँगा लहराइल।
बीत गइल बरखा के पहरा,
सिहरावन लागे भिनसहरा,
ताल-ताल में लाल उमिरिया-
खिल-खिल इटलाइल।
शरद के लहँगा लहराइल।
साफ भइल आकास सुहावन
खंजरीट उतरल मनभावन,
रात-रातभर पात-पात पर-
मोती छितराइल।
शरद के लहँगा लहराइल।
आँगन-आँगन में अगुआनी,
पूजा-दीप अरघ के पानी,
उड़ल चान के उड़न-खटोला
बलमा घर आइल।
शरद के लहँगा लहराइल।
