भारत की संस्कृति के लिए... भाषा की उन्नति के लिए... साहित्य के प्रसार के लिए
सखि! मोहिं स्याम हिकी सुधि आवै / स्वामी सनातनदेव
Kavita Kosh से
राग कल्याण, तीन ताल 2.7.1974
सखि! मोहिं स्यामहि की सुधि आवै।
स्याम विना मेरो मन सजनी! बहुत-बहुत अकुलावै।
बड़ो भाग्य, ऐसो वर पायो जाहि वेद हूँ गावै।
जाके पद को परस पाय चपला हूँ चलन न पावै॥1॥
पै का भयो, विरह ही सजनी! अपने बाँटे आवै।
प्रीतम की सुधि में तरसावत निसि-दिन विरह सतावै॥2॥
वह मुसिकान तान मुरली की जब-जब सखि! सुधि आवै।
तब-तब दसा होत कछु औरहि, कैसे सो सहि जावै॥3॥
भये प्रान प्रीतममय सजनी! बात न कोउ सुहावै।
टूक-टूक यह हियो होत, कोउ आवन की न सुनावै॥4॥
अब तो सरन मरन ही माई! पन्थ न कोउ दिखावै।
प्रान गये हूँ मिलहिं प्रानधन तो मन कछु सचुपावै॥5॥
